有齊呢10項特質★100分gf-able女生非妳莫屬!

#100分女友 #GF-able #戀愛 #貼心

明白人類總係貪心嘅,不過要一個全方位滿分、樣靚身材正、又才德兼備嘅女朋友,相個各位女士們都會認同只有動漫世界先會滿足到男士們以上嘅慾望。咁現實生活中,要做gf-able係咪真係咁難呢?咁一個100分女友應該要具備啲點樣嘅特質呢?今次,就等小編我由男人嘅角度出發,整理出「gf-able」嘅最強10個特點,做齊10個,恭喜!妳就成為新一屆嘅「唐詩詠」喇!

 

 

#1 獨立

喺一段感情入面,冇人想做baby sitter。如果妳生活上遇到困難,偶爾撒撒嬌呻下辛苦,相信另一半都會好樂意俾個膊頭妳挨下、幫妳解決煩惱。但如果太過依賴,做任何事都唔可以冇咗對方,就會加重對方壓力喇!so gals, be tough! 稍為獨立啲,記住妳嘅世界並非只有佢一人,保留返自己嘅興趣同生活,咁樣可以令對方保持對妳嘅興趣,愛情保鮮期亦得以延長。所以唔理係男人定女人,適度獨立都係成就一段快樂感情嘅重要因素。

❤️想keep住愛情保鮮度?必讀這裡!

 

 

#2 聰明

再靚嘅花亦都會有枯萎凋零嘅一日,女人嘅樣貌亦如是,所以樣貌係靠唔住嘅,唯有當彼此嘅頭腦都不相上下,喺無論生活、話題、價值觀上都可以互相sync到,咁感情先有長久走落去嘅動力。聰明嘅女人可以令男人喺生活上處處感到驚喜,試想一下,佢唔需要開到聲妳就已經為佢準備好佢想要或需要嘅嘢,呢種感覺係幾多人夢寐以求!

 

#3 性愛合拍

喺性愛方面,雙方應該要互相契合。譬如話一方面鍾意重口味,另一方面就超級清純,咁雙方都唔會透過「性」而獲得身心愉悅。男同女最好都需要喺同一個頻率上,或者耐唔耐配合一下彼此嘅喜好都可以增添情趣。當然,唔係話妳必須配合佢嘅每個要求,但係至少你哋要對彼此嘅身體、體位都唔會抗拒,願意主動滿足彼此嘅需求,咁樣佢先至會每天愛妳多一些喔~

☺️無須怕醜!即check妳和他的床上契合度

 

 

#4 充滿魅力

一個好女友,精心打扮唔止為咗對方,更大原因係要為咗自己。當兩個人走埋一齊嗰陣,妳有自信嘅樣貌同舉手投足唔止可以吸引到途人,更重要係可以吸引到佢,令佢覺得行喺妳隔離更加有自信。記住:妳從心而發出嘅內在美會勾住男人嘅心神,咁你哋嘅關係先會更加糖黐豆。

妳清楚自己的魅力所在嗎?激準鑒定妳的過人之處!

 

#5 尊重對方

尊重喺一段感情入面尤其重要,冇咗尊重,可能會令對方覺得:「我根本唔使同妳喺埋一齊!」尊重嘅意思係,就算雙方爭吵激烈,妳都可以將對方嘅意見聽入耳;喺公眾場合,妳會選擇私底下再解決紛爭,而唔係喺條街度大吵大鬧。不過,呢個係一個互相嘅概念,倘若對方唔尊重妳,相信妳都好難尊重返對方。所以切記,尊重彼此係感情入面重要嘅黃金守則。

 

#6 令對方似返個男人

就好似佢唔會限制妳同妳嘅姊妹去shopping, high tea,妳都唔應該規定佢早餐究竟應該食啲乜,或者唔俾佢同朋友出去hang out,否則到最後佢可能對妳會由愛生恨。男人同女人係天生唔一樣嘅生物,妳可以做嘅,就係放手俾佢做個正常男人,佢想同朋友打牌打機打波,只要冇抵觸到你哋嘅感情底線,就由得佢啦!

 

#7 「碎碎念」不能!

對一個男人碎碎念係絕對唔會令佢改變到啲乜,俾著係妳,妳都唔會想有個極煩氣尤似家長嘅男朋友喺妳身邊日夜不停發出低頻音波功勸妳唔好做呢樣唔好做嗰樣啦!所以身為一個好女友,需要知道幾時應該發脾氣、幾時應該安靜、幾時可以運用女友撒賴特權、幾時俾佢無傷大雅地得寸進尺。

㊙️戀情入面有咩DOs/DON’Ts? 即請高人指點一二

 

#8 可以同佢嘅屋企人/朋友好好相處

一個好女友會自發性地用心經營同對方屋企人或朋友嘅關係。會願意同佢地打成一片,譬如話會自動波關心佢嘅父母、試著認識佢嘅朋友,融入佢嘅圈子,呢啲都係出自內心嘅表現。如果有一日,男方嘅家人或朋友主動邀請妳出席聚會,咁妳已經成功闖入佢嘅生活圈子,離理想女友不遠矣。

 

#9 愛最原本嘅佢

妳必須要愛上徹頭徹尾、原原本本嗰個佢,唔需要佢為咗妳作出任何改變,因為,愛一個人,必須要包容埋佢嘅缺點同壞習慣。如果佢嘅缺點都會令妳心心眼,咁妳就可以好舒服好自然咁同呢個人走埋下半世。

 

#10 妳令佢想成為一個更好嘅人

一個好嘅女友,並唔需要多做啲乜嘢都可以自然而然令另一半想成為一個更好的人,因為只有咁樣,佢先可以帶俾妳更好嘅未來,咁你哋先可以好似童話故事咁live happily ever after!

 

有齊以上特質嘅妳,完全係每個男人心目中嘅完美對象!其實男人都只係想要一個肯支持自己並一齊進步嘅女人,喺男人嘅世界,靚到絕嘅,叫女神;而女神,只係用嚟FF。所以只要妳願意切身處地咁為對方諗多一步,要成為一位貼心女友都並非一件難事,加油!

究竟妳同佢可唔可以有情人終成眷屬,順利步入教堂呢?即測妳的大日子►