【想要日日都甜到漏?!】必學7招 愛情保鮮法

#尊重 #愛情 #愛情三觀 #愛情保鮮法 #戀愛 #溝通 #聆聽

人類係群居動物,想要有段細水長流、開心美滿嘅好姻緣係人之常情。但諷刺嘅係,當妳搵到個適合嘅人,打算同佢白頭到老,但相處日子耐咗,當情已燒盡嘅時候,妳又可能會想要多啲私人空間,繼而吵架、分手⋯⋯所謂三分天注定,另外七分妳都還需要努力呀!咁究竟點樣先可以打造一段100分關係呢?根據小編嘅研究同分析顯示,如果妳想要同伴侶一直相處得好快樂,做到以下呢七件事,幸福就手到拿來。

>清楚自己通往幸福的軌跡嗎?按這裡看看

 

#1 懂得聽對方說話

人與人嘅溝通十分重要,戀愛亦然。如果一段戀情裡面,雙方零交流、零接觸,咁拍拖嘅重點都全然消失了。所以非常重要嘅一環就係妳必須要用個心去聆聽對方講嘢,而且必須要有互動有交流,一邊齋聽又一邊顧住做自己嘅事視為大忌,因為咁樣係毫不尊重對方呀!情侶間嘅溝通在於無厘頭、天南地北、不講常理都可以不停講到世界盡頭,就算話題係無關重要,甚至毫無意義都好,只要佢肯講、妳肯聽,咁帶俾對方嘅就唔單止係交流嘅樂趣,而係可以令佢覺得「妳在乎佢」、「妳相信佢」,同埋會令佢覺得無論生活係開心唔開心都好,始終都會有個人陪佢笑下講下。

 

#2 妳唔需要將所有時間都俾哂佢

生活中,妳會發現唔少結婚已逾三、四十年嘅老夫老妻可能各有各生活,佢地唔一定要經常見面,但一見面就合拍非常,好清楚對方嘅思想、行為。由此可見,情侶間日見夜見、每日都黏膩膩咁絕對唔係建構一段快樂關係嘅主要因素!有陣時唔見面,或者見咗面都唔一定要一齊做啲乜乜乜先為之拍拖架,可能佢有佢專心睇NBA、妳有妳繼續煲未完嘅韓劇,只要知道自己隨時都可以擁有對方嘅陪伴,見面同唔見面其實根本唔重要。

>無限付出≠相對收穫,妳這樣做真的值得嗎?

 

#3 維持自己嘅朋友、生活圈子

好多人一拍拖就好似隻潛水艇咁潛咗落大海,到佢蒲返上面嗰一日,即係朋友搵到佢之時,亦都係同伴侶分手嘅一日。重色輕友係唔少人會犯嘅錯誤。冇錯!伴侶好重要,但都唔可以忽略自己固有嘅朋友、生活圈子嘅重要性!當兩人真係需要一啲自由空間嗰陣,朋友、或原有嘅生活圈子先不致令妳迷失,亦俾佢覺得妳可以獨立,唔需要成日靠佢,咁樣佢先會更加懂得尊重妳、緊張妳。而且,一個唔好彩遭逢失戀,有朋友相伴左右可以有效地幫妳重回生活正軌,好等新嘅有緣人到來。

 

#4 妳要學識「設身處地」

兩個人喺埋一齊,爭拗絕對在所難免,當爭吵嗰陣,急於呼天搶地向對方咆哮、要對方即刻接受或作出讓步都唔係明智之舉;相反地,試下逆地而處,用對方嘅觀點同角度去睇同一件事物,然後理性溝通明白「退一步海闊天海」嘅真理絕對有助妳平息怒火,而咁樣做比起無數次溝通更能夠有效地解決爭執,因為妳已經明白對方火起嘅動機同原因,咁救起火上黎都事半功倍啦!

 

 

#5 妳要時常謹記:尊重對方

人與人之間相處最基本就係必需要互相尊重。但係有時面對自己最親近嘅人反而會唔記得咗呢一點,從而做出好多事係以為為對方好,卻原來從未有真係尊重過對方嘅意願或睇法。所以情侶之間親近還親近,人與人之間最低限度應該有嘅尊重都係維持一段感情嘅重要因素。

>三分鐘極速準測戀人匹配度!

 

#6 妳要願意偶爾為對方做出讓步

現實生活中,當兩人需要共同做出一啲決定嗰陣,可能小至每月儲錢去旅行、大至結婚買樓等等,雙方都必定為對方經歷過某程度上嘅包容或讓步,而最後亦都會因為愛而心甘命抵地為對方付出。所以真正嘅愛會讓人不知不覺地學識包容同退讓,妳感受到嘅再唔會係忍耐同妥協,反而佢係會令妳心甜地「退」下來嘅唯一動力。

 

 

#7 遵守戀愛中嘅小約定

兩個人談戀愛總會有啲小約定係必須共同遵守嘅,譬如話每晚臨瞓之前要講聲good night、同異性朋友相處嘅尺度、拗交唔可以隔夜、彼此要知道行蹤之類⋯⋯呢啲得妳同伴侶兩人先知道要遵守嘅小原則表面上係令彼此心安嘅方法,背後卻係對自己另一半嘅一種尊重同二人之間嘅約定共識,識得好好運用呢啲小原則可以為妳嘅戀情帶黎唔少情趣。

>如果愛情可以打分數,他愛妳又會有多少分?

 

請記住,世界上唔會存在日日都充滿激情嘅愛情,要有恆久嘅愛情必需要靠二人不斷努力地維繫。每段美滿嘅關係都係日常點滴間累積而成,如果妳愛佢,就唔好做個懶女人,嘗試由生活小事開始,為妳得來不易嘅嘅愛情而努力!

>日本巫女靈力讓有情人終成眷屬!點我進去祈願