【感染人數大量激增】妳也患有「 已讀不回 焦慮症」嗎?

#已讀不回 #心意 #愛情 #戀愛 #短訊

其實根本唔需要解剖大腦黎分析都知道男人同女人嘅思維模式係完全風馬牛不相及,呢個分別大概由孩童時期已經知道,因為一直扮演囉嗦、長氣、嘮叨嘅角色永遠都係媽媽,由此都可以証明女人天生就係一種會「想太多」同鍾意「問到底」嘅生物。

同樣嘅「想太多」同「問到底」對號入座到正在談戀愛中嘅妳,妳係咪都曾經因為曖昧對象或是男友冇回覆短訊而陷入焦慮,妳會想出千百個問題想要問佢,「都已經藍剔剔咗五分鐘啦!點解仲唔覆我?」、「係咪唔想覆我?」⋯⋯漸漸妳會化身為一等一編劇,想出各種自己嚇自己嘅情節,然後越諗越驚⋯⋯

最終妳會忍唔住問出嗰一句:「點解你要 已讀不回 我?

💌佢成日都已讀不回我,唔通我喺佢心入面根本冇地位?

然而,對於男生嚟講,已讀不回所造成嘅不安好難明白,因為女生總會直接地認為唔覆短訊似乎同唔著緊唔在乎畫上等號。但女孩們,不如take it easy啦!以下7個方法可以助妳脫離「已讀不回焦慮症」嘅輪迴地獄,不妨參考吓~

 

方法1 唔好睇手機!

因為過度在意對方有冇覆message而忽略咗應該要做嘅事,心情絕對會插水式下降。妳每日依舊要面對生活中嘅大小事,如果仲要將自己困喺掛住佢嘅思緒當中,只會越陷越深。所以,妳必須同自己講:「唔好再注意手機!」唔好將全副心神都放喺對方已讀不回呢件事上,通常喺妳唔經意嗰陣,短訊已悄悄收到lu~

 

方法2 只係忙緊

女人天生就係鑽牛角尖嘅動物,單純地認為男生無論幾忙碌都可以覆短訊、認為呢個只係一個願唔願意去做嘅問題,況且,打幾個字可以嘥幾多時間?請擺脫呢啲婆婆媽媽嘅問題,試下去做個善解人意嘅女生,將心比心一下,然後妳就會發現,當人地忙緊嗰陣,唔鍾意俾人打斷係好正常嘅。

絕對唔好因為等唔到回訊而用催催貢嘅語氣再send message俾佢,例如:「係咪唔舒服?」「你⋯⋯好似好唔得閒?」。咁係因為,如果佢仲未對妳有興趣,咁樣咄咄逼人只會有反效果。當男生話:「好忙」而冇回覆嗰陣,其實妳真係唔使太在意,就俾啲耐性等下啦!

㊙️每次都回覆說「好忙」⋯⋯你究竟愛我嗎?

 

方法3 切記唔好發出轟炸訊息

普遍女生都會因為男生冇及時覆message,就每隔5至10分鐘send出大量文字或emoji追問,妳試諗下:有邊個會希望手機inbox被轟炸?一般男生都會認為要爬文已經好攰,仲要喺爬文之後覆妳以安撫妳混亂嘅思緒,佢只會感到壓力加倍。所以停止妳部轟炸機,學習一下安靜其實都係一件美事。

 

方法4 期待吓妳個短訊

手機短訊嘅意思在於以文字來一段雙向對話,所以呢場大氣電波嘅文字遊戲絕不能只有妳一個不停咁send出去。因為如果只有妳不停send出短訊攻擊,久而久之,佢接收妳嘅短訊會成為一種習慣,從而疏於主動發出短訊同妳聯繫。試下唔好主動send message俾佢,等時間沈澱吓你哋兩個嘅關係、俾佢期待吓收到妳嘅message。

👉👈好想知道自己是否他的命中注定?可以幫我鑒定一下嗎?

 

方法5 搵其他事做轉移注意力

如果喺等待嘅空檔,妳總係特別緊張不安,甚至連正事都無法做,咁就試下做其他事轉移一下注意力,妳大可以煮餐美味晚餐、敷個面膜、浸個浴或者睇齣戲,做乜都得,只要將心思集中喺眼前嘅事物,等待嘅心情就會得到暫時嘅釋放,通常喺妳做完呢啲事之後,都會收到回覆嘅message了!

 

方法6 唔好花太多精神等

等待的確好難捱,但會造成呢種心情可能係妳太刻意喺度「等」!諗下自己究竟花咗幾多時間糾結喺收唔收到對方嘅短訊呢件事上,即使如妳所願收到短訊後,妳都依然要拎住放大鏡去揣測每個字或emoji嘅隱藏意思,咁樣長久落去,天呀!妳會癲㗎!要注意,以上行為對身心百害而無一利,搞到精神衰弱又何必呢?試下放寬心,其實做女生也可以好灑脫!

 

方法7 在乎妳,自然會覆

當妳已靜靜雞單戀佢一排之後,相信妳都可以感受到佢對你係有心抑或無意。如果佢重視妳,咁即使當下冇即刻回覆,佢都會喺空閒嗰陣問候返妳轉頭;如果佢總係消失好幾日先覆,或者成日已讀不回,咁妳或者可以考試下呢個係咪天賜俾妳一個斬情絲嘅好時機。

💔是時候結束了嗎?我需要更確切的答案!

 

點解明明見到佢online但唔搵妳會令妳個心囉囉孿?
點解佢明明係妳男朋友但就搞到妳好似要追星咁談一場有距離嘅戀愛?
佢根本唔會知道,屏幕另一邊嘅妳,是點樣捱過被已讀不回嘅分與秒?

所以妳,必須要學習疼愛自己!

第一課,重視自己多一啲。講到尾都只係收唔到回覆姐,天又未塌落嚟,冇乜大不了。當妳尋回被遺忘嘅自尊心,自然就可以笑得更加靚。