【向孽緣說不!】女生必須小心提防的5種渣男

#愛情 #找對的人 #渣男 #男人 #苦戀

正如電影所說:「人一生總會愛上幾個人渣」,要遇見對嘅人唔容易,喺愛情嘅大海入面浮浮沉沉,中間可能經歷過幾次令人心碎嘅插曲,令我哋對「心靈伴侶」呢件事感到心灰意冷。但其實喺搵到真愛之前,呢啲傷透妳心嘅「渣男」同樣都係幫助我哋更接近愛情終點嘅中轉站,喺路途入面受少少傷,先至可以變得更堅強;睇透更多事實,先至可以令自己變得更懂事。小編憑藉多年研究同埋實戰經驗總結咗以下5類渣男,供您鑒別。妳嗰個又會係邊一種呢?

 

>>斬絕孽緣!真・愛神即將來訪

 

#1 佢對妳許過好多諾言,但最終乜都做唔到

總有種男人許諾言當食生菜,「我以後會戒煙㗎喇」、「我唔會再遲到」、「我唔會再同其他女仔出街」諸如此類⋯⋯佢完全唔介意給予承諾,亦都擅長講一啲甜言蜜語嚟討妳歡心。喺佢身邊嗰陣,妳會從佢把口感受到愛情嘅存在,因為佢會用言語堆砌出一個又一個美麗嘅愛情童話,但現實中又有幾多童話係真實存在呢?佢一切安撫妳嘅甜言蜜語都只為咗包裝佢嘅自私,當妳真正需要佢嗰陣,佢總係冇影,久而久之,妳就會安全感盡失。然後妳發現,當你哋一齊嘅時間愈耐,妳就愈會為佢曾經講過嘅嘢而爭執;就算約實咗,都會一拖再拖,佢當初許下嘅諾言亦終究無法對妳實現。妳遇到咁樣嘅男人,喺妳流過眼淚之後,會令妳睇透愛情入面各種花言巧語嘅套路,不再被盲目洗腦。

>>懶去兌現諾言代表甚麼?!他其實只是想玩玩愛情遊戲?

 

 

#2 大細路

有種男人愛撒嬌愛痴住妳,喺曖昧或熱戀初期睇落都好可愛,正正可以喚起女人心底嘅母性,對佢照顧有加。但拍拖耐咗之後妳會發現,佢會經常因為一啲小事就同妳起爭執,亦成日發脾氣,遇到問題時亦只會逃避,無法成熟處理,妳開始覺得呢段感情令妳好攰,享受唔到被寵愛嘅滋味之餘仲覺得好似多咗個仔要湊。

 

呢種男人令我哋學識「更愛自己」,談戀愛都只為咗有個可靠又成熟嘅男人依賴一下做個小女人,不為甚麼,只為咗能夠喺生活中彼此照顧,攰嘅時候有人陪妳、呵護妳、明白妳,而唔係事事要妳倒轉頭照顧返佢。

>>不要跌入大細路嘅陷阱!解構他的心在想甚麼?

 

 #3 佢只會活在當下,對未來毫無規劃 

喺感情初期,呢類型男人豁達同樂觀嘅心態總可以安撫妳嘅不安。但隨住時間流逝,雙方年紀都增長咗,唔再係談緊一場學生時期嘅puppy love,如果妳有計劃要走入婚姻生活,或者係對工作有更遠大嘅野心,妳會察覺,豁達係因為「喜歡安於現狀」,想停留原地;樂觀只係對未來冇想法。佢可能都會有夢想,但佢從來冇實行嘅動力,好快就不了了之。妳嘅擔憂同對往後嘅諗法,會變成佢所謂嘅他「諗得太遠」同「長氣」。

 

佢哋會令我哋學識「睇得更遠」,女人總會因為愛情而陷於「當下」,當我哋擴看闊咗眼界,會發現,走到最後愛情應該看的是潛質,而唔係表面。

>>既然佢毫無計劃,我仲可以同佢一生一世嗎?

 

#4 非常介意付出嘅小心眼

呢類型嘅男人通常把口過油咁,好識講說話,仲好識做表面功夫,會間唔中請妳食幾餐飯,又肯陪妳出席朋友間嘅大小聚會,但佢要求有來有往、等價交換或更甚。可能佢會要妳送返啲名貴禮物俾佢、或者要喺佢啲朋友面前扮聽話嘅小女人⋯⋯當妳做唔到嗰陣佢就會將自己做過嘅「好事」全部如數家珍咁,仲會對妳呼呼喝喝,不平等嘅關係令妳精神崩潰。

 

佢哋令女人學到,愛情入面「平衡」係一件非常重要嘅事。並唔係要妳下下都要計住邊個付出得多與少,而係要識得喺呢段感情入面,唔好將自己嘅擺位擺得太低,妳並唔係佢嘅奴隸或附屬品、妳理所當然可以獲得尊重、妳值得被寵愛。

  

#5 妳永遠都唔係佢最重要嘅女人

首先唔好諗多咗,呢度講嘅唔等如有第三者。只係當妳發現自己永遠都唔會排喺佢心目中嘅頭位,妳會開始變得神經質,想喺佢沖涼或瞓覺嗰陣check佢手機、見到佢ig可能只係follow多咗一個異性都會令妳感到不安,到最後,妳嘅多疑會令佢反感,漸漸被塑造成愛猜忌、令人「無自由、失自由」嘅女朋友。

呢種心灰意冷,會令女人知道喺感情入面「ranking」嘅重要性,妳要俾佢知道,妳將會係佢人生入面最重要嘅一個人,如果妳退讓就只會助長佢變本加厲,無限嘅包容同忍讓成為咗義務,愛情亦會逐漸褪色。

>>速測妳究竟喺佢心入面排第幾?

 

若發現妳嘅男友正係呢5種之一,請妳同呢啲渣男們講聲good bye and thank you,而家為佢哋流嘅眼淚,都會成為妳往後愛情嘅美麗珍珠。

>>遇見渣男 ≠ 人生失敗!月老測字搵出命定姻緣